尋日o係屋企休息 始終唔可以成日出街玩既

o係屋企見無聊無咩做 就開左隻陳年舊戲「最佳女婿」黎睇

呢套戲係由周星馳、張學友、莫少聰3個主演

開初我以為呢套戲都應該係星爺玩晒居多 但睇完先發現 其實星爺戲份唔算太重 極其量係半個主角黎 其餘一半就由另外兩個人分擔

故事係講學友係潮流髮型師 星爺係風水佬 莫少聰做車衫 3個係老死黎 學友同星爺明顯上比較FD 成日夾埋整古另一個 就算到最尾一齊搶BB都係咁

學友就開左間新髮型屋 隔離就係一間上海理髮屋 三個人同時都鍾意人地老闆個女

本來上海鋪老闆就想送個女去參加港姐 見到有三個狗公纏住佢 就諗住借佢地3個過橋黎佢地自己狗咬狗骨 點知就反而搞到個女俾佢地3個一齊搞大左個肚

3兄弟血型相同 當時無得話咩驗DNA 個仔都唔知邊個 佢地3個都鍾意人地 唯有用盡方法去贏得人地既歡心 人地老豆亦都多次提出一D難到爆既條件先肯俾個女嫁出去...

最後贏得果個就成為最佳女婿...當然 成套戲都係用搞笑風趣既手法去拍 最後睇到係莫少聰贏 都唔覺得咩意外 但睇埋最尾果段"8年後" 就覺得成套戲既意思先出黎...

話說個仔長大後同佢完全唔似樣 細眼大鼻 仲好鍾意亂咁幫人剪頭髮...返學仲成日俾人笑同老豆唔似樣...

上面果個難到爆既條件係：50萬美金、60圍酒、1300呎洋房 莫少聰樣樣都o係8年內做齊 但老豆就話好似爭咁隻游艇喎 咁佢就話聽日去買隻返黎 老豆之後拉埋佢去另一邊講 "都係寫我名喎" 之後鏡頭影住一個O左咀既人就打字幕完場...

故事講完 講下其他野

有幾幕真係幾好笑 例如話3兄弟一齊煮飯果幕 個個都亂黎嚇死人

兩個的士司機互相通話果幕 真係笑到你死

3兄弟一齊衝上人地屋企搶返個BB 幫IQ博士配音果段...真係笑到肚痛

順帶一提 呢套戲有已經過世既肥肥份...

琴晚同鄒康金爺3個一齊去左元朗睇夜行悍探

由上次睇到預告片時 我已經係咁周圍同人講想睇...拖到今日終於睇到

套戲岩岩開場時發生左件事 有大約為數7-9個爛仔(容我咁稱呼你地啦) 佢地每個人都拎住一兩包爆谷 未入黎已經聽到佢地既聲音

見到佢地入黎 我心諗呢個半鐘都肯定有排嘈 佢地成堆人亂咁搵位坐低 大約嘈左2,3分鐘 佢地其中一個有人問:喂,呢套咩黎架??

跟住成堆人就走晒...全場又立即回歸平靜...究竟班人知唔知自己買咩飛睇咩戲??

對上一次睇奇洛李維斯既戲已經係魔間行者 今次唔係講鬼講科幼 純粹係套"警察片"

可以用鬼打鬼黎形容成個故事啦 唔睇到後期都唔知邊個係主腦...順帶一提 呢套戲好多粗口對白...尤其最尾警司果幕爆得最激同最精彩...呢套戲我俾8分啦...

睇完後同佢地落返X行下 見到一個奇觀 我地見到所有怪人都齊集晒o係度...例如一個家住出面市區...但一星期至少有5,6日都見到佢日頭身在機鋪...夜晚身在附近網吧訓覺既大師...

又有一個 無論同佢講咩話題都好 佢第一句一定係問候下人地娘親先肯入正題既詛咒師...

又有一個 佢永遠唔會拎銀包出黎 每次佢打機都一定o係褲袋拎錢出黎 但奇怪地佢可以每次3蚊3蚊咁入 入足成晚個褲袋都仲有錢既...奇怪在點解佢褲袋咁細...但點解可以次次拎到成4,50蚊出黎玩??我地稱佢為魔術師

仲有一個 全程咬實支煙仔黎玩結他 佢真係唔驚支煙燒到埋個口度 同埋唔該唔好開light玩...

跟住達叔又落黎 佢仲搞野 戴住黑超落黎 夜麻麻仲戴黑超??佢話副野戴落去都係睇野黑少少無咩分別 仲可以望完女仔人地都唔知添 之後我都戴住黎玩左鋪 真係睇到眼水都標埋...

離開左X呢個煙火鼎盛既地方果陣都成12點8 金爺搭車走左 我地3個就繼續周圍行 落左去GAMES睇睇啦 見無咩人就唱左幾個代幣黎玩下 我地唔識玩莊閒 推銀機又無咁多銀 唯有玩射擊GAME 有時射中就有銀出 有時就無 究竟隻GAME點樣計分架...

差唔多2點先到阿峰夾玩 迫佢玩左首難歌 連佢上千分都過唔到 唔怪之得我都唔得啦...

跟住我地3個去左D路邊檔口食野 食下野吹下水都成3點幾先上小巴...

第二日就訓左一日 發左個夢 見到好多小學中學時既同學 仲要一齊上堂添 已經無讀書近半年整個咁既夢黎算咩意思...

最後想講係...我唔可以再得個講字唔去做 真係要快D搵個第二份工 再咁我真係會變自閉青年

今日返工都無咩做 行行企企咁就一日

不過有樣趣事發生左 就係老闆D留言

佢寫左份野用黎"吩咐"俾副經理搞

頭幾項都係D正經野黎 叫佢邊度邊度要做好D

睇到最尾果段先搞野 佢叫經理記得清理好個場 唔好再留煙頭o係間房入面

副經理返到黎睇到嚇到佢幾乎死咁濟...因為佢都係元兇之一

夜晚有幾個人都食煙 呢樣野好多人都知 只係無人知佢地鍾意成堆o係經理房度齊齊煲

有人唔小心留低煙頭 俾老闆發現左 以後仲邊夠膽搞到間房臭晒

----------------------------------------------------------------

頭先量血壓 126...正常掛...

琴日星期五係BBQ日 前一晚2點幾先訓

果朝就要9點幾起身...11點左右落到元朗轉64K出去

真係揀錯時間上車 成程車係咁有人上車落車 又要整件八公o係前面係咁吹水 咁樣坐左成個鐘先到太和

轉左架25A入村 我又問得唔清楚 司機又唔知我邊度落車 求其送左我去教堂就落車 原來果度先至係村口

等左陣就齊晒人 其實我而家都未分得清邊個打邊個 反而BBQ就唔係燒左話好耐...玩貓就玩得多 點解我唔記得幫佢地3隻野影相??

之後玩左陣KILLER 影左相 6點到我就走左 出到去諗住孤寒少少唔搭小巴 自己行返出去 點知足足行左半個鐘先搵得返康樂園站 仲要之前行錯路...上到車就要無位坐 好在架車去到錦上路就好多人落車 搵到位唔夠一陣已經訓著左 返到東頭村先扎醒 落車時又落雨

8點幾過到去搵返達叔同楊宇 諗左好耐都係決定去返M記食野 食食下野JJ喊晒口打黎 楊宇問極佢都唔講 叫佢出黎講佢又唔出 我真係估唔到咩事...

跟住拎左楊宇份CE卷黎睇 咩野春江花月夜 唔知咩黎...

之後都係無無聊聊落左去GAMES睇下野 手多多玩返兩鋪機 唔覺唔覺又有分加喎...

鄒康夜少少黎左 一齊過左X睇下 落到去竟然咩人都無 轉過頭玩玩下都係見到然哥同WYMAN...吹左陣水佢地又閃左...

又到達叔夾左鋪機玩下 今日好似上身咁 終於過左900分 V4既願望達成 V5先再算喇...

2點幾一齊去左網吧HEA 玩1942都玩左成晚 結果成8點先返到屋企 咁攞命既日子我一星期一日都嫌多 點解阿然哥可以一星期去足4,5日...仲要晚晚唔返屋企架??

今日真係算得好開心

７點鐘仍然身在cyper8..........................................